قصـــيدة الله حـــى شعــــبنا حى .

الله حي شعبنا حي
وسع سكة لبكرة الجاي
ورد شبابنا المصري البلدي
ولا فيه شبهه ولا له زي
قالوا شباب قاعدين في كافيه
عفاريت طلعوا ولاد الإيه
عارفين امتى وفين مع ليه
شايفين كل طريق للضي
من دمهم الغالي اتوضى
وطن الخوف والموت والردة
طلع الصبح وصلى وعدا
من ليل أمس لأجمل ضي
ياه على وطن اتهان وإتباع
ياه على شعب اتعرى وجاع
سمسروا حتى في الاوجاع
لحمنا كانوا بياكلوه ني
أيوب نبي علشان كان صابر
شوف المصري النبي والصابر
يطغى عليه الطاغي وقادر
يفضل ثوري ووطني وحي
التحرير كان اسم ميدان
أصبح للثوار عنوان
الشبان قلب الاوطان
هم الفرحة وهم الضي
يوم 25 يناير

هو تاريخ الشعب الثاير
رجعتونا لعزة ناصر
بعد الموت الوطن اهو حي
المولوتوف ورصاص مطاطي
غلبه جبين وضاء ما يطاطي
لبنى بسادة وعبد العاطي
عمره ما سلم ولا قال أي
الله حي شعبنا حي شعبنا حي.